Bestelle vo mae ƒ 12,50? Kiek gliek onderan!

Klik ’ier vo tweê gedichten uut de bundel

Dichtbundel Lou Vleugelhof:

Zeêuws paereltje!

Begin maerte verscheen den eesten Zeêuwsen dichtbundel van Lou Vleugelhof. Dien bundel, ‘Aol Zeêuws vandaège’, laet in eêne keer ziee, da je mee Zeêuws zòvee meer kan as simpele riempjes en vesjes over vroeger schrieve. In dertig gedichten bewiest Vleugelhof a je mee ’t Zeêuws minstens net zòvee kan as mee ’t Nederlands.

Vleugelhof (een pseudoniem van L. P. de Jonge, Ovezande 1925) is dichter en essayist. D’r bin a verscheien bundels van z’n verschene (onder aore Beeldentuin, Mijn antieke vrienden, Zeven manieren van zwemmen). Vo de PZC eit n een ‘êle reêste artikels over Zeêuwse dichters geschreve. Ie eit oôk een bloemlezienge van Zeêuwse poëzie verzurgd, die a in 1999 as Zeeuws Boekenweekgeschenk uut kwam.

Zelf zeit Vleugelhof over schrieven in ‘t Zeeuws: ‘Schrieve in j’n eêste taèle, die a je as ’t waere mie de moedermelk ei in’ezoge, betêkent wee in anraèkienge komme mie de wèreld zò as je n voe ’t eêst ‘eprove, ‘eroke, ‘eziee en an’eraèkt eit.

‘Daè bin vee zintugelijke ervaeriengen in mien gedichten anwezig en ik dienke da poëzie daè sterker, gespierder en gevoeliger van wor en vee dichter komt bie de oerbron van de taèle, ’t mènselijk lichaèm. Dichte is ok proeve, ruke, voele, ete, drienke en kaauwe. De rest is dienkwerk en vee poëzie wor daè nie beter van’.

In de bundel wier speciaal vo ‘t west-Zuud-Bevelands een spelwieze ontwikkeld, die a gebaseerd is op de vee algemênere ‘schriefwieze’ die in ’t tiedschrift Noe oor gebruukt. ‘Aol Zeêuws vandaège’ is een uutgaeve van Stichting Zuudwest 7, een joenge organisatie die a z’n eige richt op ‘t verbeteren van ‘t imago van ‘t Zeêuws. De uutgaeve van Vleugelhofs bundel, prima poëzie in een keurig verzurgd jasje, past dae prima bie.

Lou Vleugelhof, Aol Zeêuws vandaege, uutg. Stichting Zuudwest 7 (Ritthemsestraete 14, 4388 JR Oôst-Souburg). ISBN 90-806174-1-5, veertig bladzies, wienkelpries ƒ 15,95.

Bestelle: via internet ka je de bundel rechtstreeks bie den uutgever bestelle vo mae ƒ 12,50 (excl. verzendkosten) deu een mailtje mee naeme, adres en ‘t aantal bundels dat a je wil è te stieren nae zw7@zeelandnet.nl. Je kriegt je bestellieng plus een factuurtje zò gauw meugelijk thuus!