Avont-gebet

Op: Christe die du bist doch &c.

De nacht de moeder vande rust
Des hemels groote fackel blust.
Van arbeyt zijn de leden moe,
Den sluymer druckt de ogen toe.

O Hoeder groot van Israel
Weest ons een trouwe nacht-gesel
En wacker om ons henen siet
So vresen wy den vyant niet.

Ghy hebt al wat op aerden is
Begraven inde duysternis,
Begraeft oock onse sonde boos
In u genade grondeloos.

Wanneer het lichaem slapen gaet
De siele doch niet slapen laet
Maer waken tot u alle tijt
Die aller sielen vader sijt.

Tot dat het aertsche wederom
In soeten slaep ter aerden com,
Den Geest in volle salicheyt
Daer haer de rust is toegeseyt.

—

Jacobus Revius (1586-1658)