Seulete suy et seulete vueil estre,
Seulete m’a mon doulx ami laissiee,
Seulete suy, sans compaignon ni maistre,
Seulete suy, dolente et courrouciee,
Seulete suy en languour mesaisiee,
Seulete suy plus que nulle esgaree,
Seulete suy sans ami demouree.

Seulete suy a huis ou a fenestre,
Seulete suy en un anglet muciee,
Seulete suy pour moy de plours repaistre,
Seulete suy, dolente ou apaisiee,
Seulete suy, riens n’est qui tant me siee,
Seulete suy en ma chambre enserree,
Seulete suy sans ami demouree.

Seulete suy partout et en tout estre,
Seulete suy, ou je voise ou je siee,
Seulete suy plus qu’autre riens terrestre,
Seulete suy, de chascun delaissiee,
Seulete suy, durement abaissiee,
Seulete suy, souvent toute esplouree,
Seulete suy sans ami demouree.

Princes, or est ma doulour commenciee :
Seulete suy de tout dueil menaciee,
Seulete suy plus tainte que moree,
Seulete suy sans ami demouree.

—

Christine de Pizan (±1364-±1429)

Christine de Pizan, Poésies d’Amour; Aumage, Paris; ISBN 2915070075
The Selected Writings of Christine De Pizan: New Translations, Criticism (Norton Critical Edition); W.W. Norton, New York; ISBN 0393970108