Ick heb gheen vrede, en ben met niemant twistich:
ick hoop, ick vrees, ick vriese in den brant:
ick legh op d’Aerde, en vliech ten Hemel listich:
myn sinnen syn wuft, en op een plaets gheplant:
die my heeft ghevangen, die wyst my vander hant:
sy wil my niet hebben, die my vast hout ghebonden:
willens ick verderf, en roep help t’allen stonden:
liefde laet my sterven, noch vree verwerven niet:
ick cryt sonder tongh, sie met ooghen bewonden:
lachende sucht ick, ick verbly my in ’t verdriet:
ick slaep by daech, en ’s nachts alst niemant siet,
loop ick op straet, prys duysterheyt voort lichte:
den stercken stock verwerp ick, en steun op een riet:
leven en sterven is my eens int ghewichte:
al deus vreucht ryst my alleen uyt Liefs ghesichte.

—

Vert. Roemer Visscher