D’un vanneur de blé aux vents

A vous troppe legere,
Qui d’aele passagere
Par le monde volez,
Et d’un sifflant murmure
L’ombrageuse verdure
Doulcement esbranlez,
J’offre ces violettes,
Ces lis, et ces fleurettes,
Et ces roses icy,
Ces vermeillettes roses,
Tout freschement écloses,
Et ces œuilletz aussi.
De vostre doulce halaine
Eventez ceste plaine,
Eventez ce sejour :
Ce pendant que j’ahanne
A mon blé, que je vanne
A la chaleur du jour.

—

Tr. Joachim du Bellay