Rogare longo putidam te saeculo,
Viris quid enervet meas,
Cum sit tibi dens ater et rugis vetus
Frontem senectus exaret
Hietque turpis inter aridas natis
Podex velut crudae bovis.
Sed incitat me pectus et mammae putres,
Equina quales ubera,
Venterque mollis et femur tumentibus
Exile suris additum.
Esto beata, funus atque imagines
Ducant triumphales tuum,
Nec sit marita quae rotundioribus
Onusta bacis ambulet.
Quid? quod libelli Stoici inter Sericos
Iacere pulvillos amant:
Inlitterati num minus nervi rigent
Minusve languet fascinum?
Quod ut superbo provoces ab inguine,
Ore adlaborandum est tibi.

—

Quintus Horatius Flaccus (689-746AUC)

Horatius, Verzamelde gedichten; Historische Uitgeverij, Groningen; ISBN 9065543627
Horace in English; Penguin Books, Harmondsworth; ISBN 0140423877