Quand vous voyez, que l’estincelle
Du chaste Amour soubs mon esselle
Vient tous les jours à s’allumer,
Ne me debvez vous bien aymer?
Quand vous me voyez tousjours celle,
Qui pour vous souffre, et son mal cele,
Me laissant par luy consumer,
Ne me debvez vous bien aymer?
Quand vous voyez, que pour moins belle
Je ne prens contre vous querelle,
Mais pour mien vous veulx reclamer,
Ne me debvez vous bien aymer?
Quand pour quelque autre amour nouvelle
Jamais je ne vous seray cruelle,
Sans aucune plaincte former,
Ne me debvrez vous bien aymer?
Quand vous verrez que sans cautelle
Tousjours vous seray esté telle
Que le temps pourra affermer,
Ne me debvrez vous bien aymer?

—

Pernette du Guillet (± 1520-1545)

Louise Labé, Œuvres poétiques – Pernette du Guillet, Rymes; Gallimard, Paris; ISBN 2070322386