Sur la rive d’un fleuve une Nymphe esploree,
Croisant les bras au ciel avec mille sanglotz,
Accordoit ceste plainte au murmure des flotz,
Oultrageant son beau teinct et sa tresse doree :

Las, ou est maintenant ceste face honoree,
Ou est ceste grandeur et cest antique los,
Ou tout l’heur et l’honneur du monde fut enclos,
Quand des hommes j’estois et des Dieux adoree ?

N’estoit-ce pas assez que le discord mutin
M’eut fait de tout le monde un publique butin,
Si cest Hydre nouveau, digne de cent Hercules,

Foisonnant en sept chefz de vices monstrueux,
Ne m’engendroit encor à ces bords tortueux
Tant de cruelz Nerons et tant de Caligules ?

—

Joachim du Bellay (1525-1560)

Joachim du Bellay, Œuvres poétiques; S.T.F.M., Paris