Kerstpakket
Ja de daehen worre korter, tied van kerst die komt in zicht
De middenstand ei feest’luk etelages inhericht
D’êêste kerstmannen bin a hesinjaleerd
Zelfs bie ons in de febriek, speelt a daehen kerstmeziek
En voe d’arbeidsvreugde is dat nie verkeerd
Ik è vlak nae de Sinterklaas avast de kersboom ophezet
En zô kom ik in de stemming van rollad’en van hoermet
Mer êên dieng speel deur m’n esses, kriet nie uut m’n ôôt
hezet
Wan over amper veertien daehen kriek m’n kerstpakket
Kè visioenen van zô’n dôôze, ist’n hroen of ist’n rôôd
Ik bluv’r mè an dienke, ist’n zwaer en ist’n hrôôt
Zitt’n stevig mie ’n
rêêpe plakband dicht
Ja om dezen tied van’t jaer, val me ’t werken nie zô zwaer
En zô komt dien lesten dag a hauw in zicht
Ik kan de slaep nie zô hoed vatte, ik draai’en kere in m’n
bed
Ik è voe alle zekerheid drie wekkers scherp hezet
En nog zie’k kans om ’t te verslaepen, ni m’n werk as ’n
raket
Wan vanmiddag om alf viere kriek m’n kerstpakket
Zô’n leste werkdag van ’t jaer val in principe nog wè mee
Behalve veeh’ en poese doe me eih’luk nie zô vee
Alle werkers bin a in d’r hoeie pak
Ja je voelt d’ adrealine, ut is kerst in de kantine
D’r is vreed’ op aerd’ , en koffie mie hebak
Mè bie den toespraek van d’n directeur è’k hladnie ophelet
Ik è m’n stoel vlak bie dien taefel mie die dôzen neerhezet
Ik stae as êêsten in de rij, hin mens die a mien dat belet
K bin over tien menuten tuus, mie m’n kerstpakket
Ik bin vandaehe op de fiets, ja ’t is even langer rie
Eêl de buurte kan ut pak op m’n behagedraeher zie
‘k geve toe, ut is ’n bitje voe de sjow
Ik bedienke ondertussen, a me soms is iets nie lussen
Nou dat stiere me hewoon ni Kosovo
De vrouw’ ei traenen in d’r ôhen, huus die danse van de pret
Tussen de wosjes, de rahoe, en de letter van banket
Zelf bin’k stille en wat droevig, wan ik bedienke net
Da’k wee ’n êêl jaer lang mô wachte op ’n kerstpakket