Kerst as kind.

’t Ei ’n êle nacht hesneeuwd, ’n witte wereld is je dêêl

De poezen doe verwonderd d’r beklag

Vader zet de fietsen klaer, wan me motte d’r nog uut

Vandaehe is ’t op ’t durp ’n hrôôten dag

De zondagschole viert tradietioneel z’n eihen feest

Dat haet altied deur in weer en wind

Onze sporen in de sneeuw bin de êêste van dien dag

Verwachtingsvol beleef je kerst as kind

Janus Niese leest ’n kerstverhaal

En de kinders zienge vesjes

En Heeloed in z’n beste pak

Die let op alle kaesjes

De kerk’is lekker werm, en ok nog sfeervol anheklêêd

Echte kaesjes in ’n echten bôôm

Kinders voere stikjes op, ouwers bin stik hrôôs

De leiding oudt ’t êle spul in tôôm

En je krieg ’n applesiene, en je krieg ok ’n mooi boek

’t pakpapier verwijder je hezwint

Hin Arendsoog of Pietje Bell, mè W.G. van der Hulst

Stichteluk beleef je kerst as kind

Janus Niese leest ’n kerstverhaal

En de kinders zienge vesjes

En Heeloed in z’n beste pak

Die let op alle kaesjes

In ’t schemer trug nir uus, de kolekachel ophestookt

Vader doe de oute blinden toe

Ik knoeie wat mie kaesjes op ’n aanrecht van hraniet

Ik zou ’t nog wè ’s over wille doe

En elk jaer om dezen tied dienk ik even trug an die zurhelôze kinderjaeren.

An dat knusse kerkje op m’n heboortedurp.

En besef ik dat dat portaal mie ons boek en appelsiene eihenluk de poorte was ni ’n vedder leven. Dan probeer ik ’n moment te vinden da ‘k even m’n ôhen dicht kan doe, en die wermte en ’t heluk uut m’n kinderjaeren opnieuw beleve.

En dan zie ‘k wee oe a vrede d’r in al z’n eevoud uutzag :

Janus Niese leest ’n kerstverhaal

En de kinders zienge vesjes

En Heeloed in z’n beste pak

Die let op alle kaesjes