ERTESOEP OP DE BôôT.

 

De Schelde is brêêd, de Schelde is hries

En de wind steekt nog op bovendien

Ut is 'n slecht teken, meeuwen op 't land

En de pont is mer amper te zien

De zêê schuumt, de wind wakkert an

Holven as 'uzen zô hrôôt

't gae stevug tekeer, mè je weet mi dit weer

Ist'r wee ertesoep op de bôôt

 

De Schelde is brêêd, de Schelde is zwart

En de overkant is nie in zicht

Ut 'out van de steihers, 'n kraekend protest

En de maene heef bienae hin licht

De zêê kolkt, de sturm steekt noe op

Berichten van schepen in nôôd

Mè mi stromende rehen, en mi windkracht nehen

Ist'r wè ertesoep op de bôôt

 

Want d'r is 'n hofmeester, en d'r is 'n kombuus

En de soep kom nog nie uut 'n pak

D'r ange nog theedoeken boven 't fornuus

Catering is nog 'n vak

 

De Schelde is brêêd, de Schelde is woest

En de bôôt stampt d'r dwars tehen in

As 'n nietige stip onder 'n inktzwarte lucht

Asof t'r hin natuurwetten bin

Ja de bôôt vaert, de bemanning alert

D'r petten staen stoer op d'r ôôt

En die angst van zônet, is verdwene an't buffet

Want d'r is ertesoep op de bôôt

 

En komt'r 'n tunnel, 'n bruhhe of 'n dam

Voe mien is 't oud iezder om lôôd

Ok a eit ut verkeer, dan hin last mi van 't weer

Z' è d'ok nooit mir ertesoep op de bôôt

Want ut doek valt, ut eind is in zicht

'n traditie bloei jammerluk dôôd

Mè de mythe leef voort, van ut leven an boord

En die echte ertesoep op de bôôt