De juun

 

De zunne komt op, en je stapt op je fietsje

Je lief doe nog zeer, van d'n vorihen dag

Je kleren stae stieve, van juun en van modder

Je wou da' j nog lekker op je bêddetje lag

 

Toch buug je voorover en zakt op je benne

Wan den baes stae te kieken, en die haet over lieken

En a komtet je neus uut, je laet je toch nie kenne

Uuteindeluk wor je wer imuun, voe de juun

 

Je rekent en rekent wat a j' a verdiend eit

Wan je werkt voe de centen, en nie voe de lol

Je vrienden è d'n baantje, bie 'n ome op kantoor

Mè jie ei nie zô'n ome, dus ou je mè vol

Behon je mie twintug man, noe bin d'r nog zesse

Wan d'n een nae d'n aeren, die haet er vandeu

Pien in d'r buuk, of mee 'n smoesje ni de tandarts

Mè wè lekker ni 't zwembad, wan ze waere ut zô beu

 

Mè jie, jie buug voorover en zakt op je benne

Wan den baes stae te kieken, en die haet over lieken

En a komtet je neus uut, je laet je toch nie kenne

Uuteindeluk bi'j a 'n bitje imuun, voe de juun

 

En nae al die weken, dan zit je op je kaemer

Mee 'n nieuwe pick-up, en 'n nieuwe l.p.

Paer centen over voe 'n weekje vekansie

En dan wee ni schole, dat valt dan wee nie mee

 

Toch buug je voorover en pakt ni je penne

Wan de leraar stae te kieken, joeng je mag ier toch nie spieke

En a komt 't  je neus uut, je laet je toch nie kenne

Want je dienkt nog is trug an die juun,

An die juun, oh de juun, de juun