Alene, mie de kerst

M’n vriendin is vertrokke, en ik è d’ik hin huus

‘k bin nerhest uuthenodigd, dus bluuf ik mè tuus

Meneihen afvraehe, wat mô ‘k mie die daehen

D’r is vrede op aarde, mè dat is hin excuus

D’r is nerhest wat te doen, en niks op TV

Mè ‘k èn staepel mooie boeken, en un nieuwe CD

Ak wil kan ‘k dineere, in m’n smerigste kleren

En d’n afwas laete stae, wan di zit ik nie mee

‘k è zô’n plestik kersboom, mie lampjes der in

En ‘k glôve werachtug, dak di helukkig mie bin

Hin kedootjes deronder, mè ik kan ok wè zonder

‘k doe nog ’n bakje koffie, mie ’n borrel derin

‘k è toch nog wat extras, voe m’n katje hekocht

En voe meneihen, un mooi wientj’ uuthezocht

En op m’n hemakje, werm ik dan m’n prakje

’t komt uut de vriezer, mè dirrom is ’t gin bocht

Straks is ’t wee over, die daehen verbie

’t Is voe ’t êêst in ’n weke, dak wee mensen zie

Ik ôôre ze klaehe, over pien an der maehe

Ik mô d’r om lache, mè dat wete ze nie